ရောင်ခြည်ဦး၊ ၉ ရက် ဇွန်လ ၂၀၂၃ ခု
၂၀၂၃ ခုနှစ် (၆)လတာ ကာလတွင်းမှာ ထိုင်းနိုင်ငံရောက်မြန်မာအလုပ်သမားတွေရဲ့ အကူအညီတောင်းခံတာနဲ့ လုပ်ငန်းခွင်တွင်း ချိုးဖောက်ခံရမှု တိုင်ကြားတာတွေဟာ သိသိသာသာ မြင့်တက်လာတယ်လို့ ရောင်ခြည်ဦး အလုပ်သမားများအဖွဲ့၊ ဥပဒေရေးရာ အထောက်အကူပြုဌာနရဲ့ အချက်အလက်တွေအရ သိရပါတယ်။
ကောက်ခံရရှိထားတဲ့ သတင်းအချက်အလက်တွေအရ အခုနှစ် ၆လတာကာလအတွင်း လက်ခံရရှိထားတဲ့ တိုင်ကြားမှု အရေအတွက်ဟာ ပြီးခဲ့တဲ့နှစ် တစ်နှစ်တာစာရင်းနဲ့ တူညီလုနီးပါးဖြစ်နေတယ်လို့ သိရပါတယ်။
လတ်တလောမှာ ထိုင်းရောက်မြန်မာအလုပ်သမားတွေအနေနဲ့ အလုပ်သမား အခွင့်အရေး ချိုးဖောက်ခံရတာတွေ၊ အထောက်အထားနဲ့ ပတ်သက်တဲ့ ပြဿနာတွေ၊ လုပ်အားခ ပြဿနာတွေ အစရှိသဖြင့် တိုင်ကြားတာတွေ လုပ်ဆောင်နေတာ ဖြစ်တယ်လို့ ဆိုပါတယ်။
“အများဆုံးတိုင်တာကတော့ တရားဝင်အလုပ်သမားလက်မှတ် အထောက်အထားကိစ္စပေါနော်။ ပြောရရင် လက်မှတ်လျှောက်ထားတာက အခုချိန်မှာ လုပ်ငန်းစဉ်ပိုရှုပ်ပြီးတော့ ငွေကြေးပိုကုန်ကျတယ်။ အလုပ်ရှင်က တာဝန်ယူလုပ်ပေးတာလည်းမရှိတော့ ပွဲစားလက်အပ်တယ်။ အဲဒီမှာပိုက်ဆံက ပိုကုန်ပြီးတော့ အလုပ်သမားတွေဆီက ပိုပြီးဖြတ်တောက်တာတွေ ရှိလာတယ်။ နောက်အလုပ်ရှင်က စာရွက်စာတမ်းအစစ်ကို သူတို့က သိမ်းပြီးတော့ အလုပ်သမားတွေကို မိတ္တူပဲပေးတယ်။ အလုပ်ပြောင်းချင်တာတောင် မထုတ်ပေးဘူး။ ဒါမျိုးအမှုတွေ များလာတယ်။ ပြီးတော့ ပွဲစားကပိုက်ဆံယူပြီး အထောက်အထားကို ပြည့်စုံအောင် မလုပ်ပေးတာတွေ တက်လာတယ်။ ဒုတိယများတာက MOU အလုပ်သမားတွေကိစ္စပေါ့။ သူတို့ကျတော့ စာချုပ်ထဲမှာပါတဲ့ လုပ်ငန်းခွင်မဟုတ်ဘဲ တခြားနေရာတွေရောက်နေလို့ အကူအညီတောင်းခံလာတာတွေ ရှိပါတယ်”လို့ ရောင်ခြည်ဦး အလုပ်သမားများအဖွဲ့ရဲ့ ပြောရေးဆိုခွင့်ရှိသူက ပြောပါတယ်။
စစ်အာဏာသိမ်းပြီးနောက်ပိုင်းမှာ ပြည်တွင်းကနေ ထိုင်းနိုင်ငံကို ပုံစံမျိုးစုံနဲ့ ဝင်ရောက်လာသူများစွာရှိနေပြီး အလုပ်အကိုင်၊ အခွင့်အလမ်း စိန်ခေါ်ချက်တွေရှိလာတယ်လို့ ထိုင်းနိုင်ငံအခြေစိုက် အလုပ်သမားအရေး ဆောင်ရွက်သူတွေဆီ သိရပါတယ်။
အလားတူပဲ ပြည်တွင်းကနေ ထိုင်းနိုင်ငံကို တရားဝင် MOU စနစ်နဲ့ သွားရောက်လုပ်ကိုင်လိုသူများစွာရှိနေပြီး ငွေကြေးလိမ်လည်ခံရတာတွေလည်း သိသိသာသာ မြင့်တက်လာတယ်လို့ ပြည်ပအလုပ်အကိုင် ဝန်ဆောင်မှု လုပ်ငန်းလုပ်ကိုင်နေသူတွေက ပြောဆိုထားပါတယ်။
မူရင်း – Myanmar Labour News
ရောင်ခြည်ဦးအလုပ်သမားများအဖွဲ့
– (+66) 0869382757
Viber �� (+66) 0869382757
